Orain arte irakurritakoarekin, jada jabetu zarete ingurune adimendunak zer diren. Eta orain kontzeptu horiek guztiak zertan aplikatzen diren ikasiko duzue. Ikerketaren atala da hau. Euskal Herrian nahiz munduan egiten den ikerketa ezagutzeko gida bat izango da atal hau, baina, noski, gida horretatik kanpo beste hainbat proiektu ere topa ditzakezue. Proiektu horietakoren bat hautatu beharko duzue gero zuen aplikazio 'futurista' imajinatzeko.

Ikerketa horiek ezagutzeko, Interneteko ariketa hauxe egin beharko duzue lehenengo. Pausoak ondo emanez gero, martxan dauden hainbat proiektu ezagutuko dituzue, ingurune adimendunak egia bihurtzeko garatzen ari diren proiektuak.

Has gaitezen bada!

Argazkia: AMIGO

Lehenik eta behin, gure ingurukoak ezagutuko ditugu. Horretarako, Basque Research eta Zientzia.net web guneak dituzue. Web gune horietan gai honekin lotutako hainbat albiste topatuko dituzue. Hamar baino gehiago daude Basque Research-en, ea guztiak aurkitzen dituzuen. Gainera, robot berezi bat ere badago hor tartean, Marisorgin du izena.

Kontuz, hala ere, ingurune-adimeneko hainbat albistez gain, harekin zerikusirik ez duten beste hainbat topatuko dituzue eta; zuek egin beharko duzue garbiketa. Basque Research-erako pista bat emango dizuegu: albisteen goiko aldean, gako-hitzetan, ingurune adimendunak jarriko du albistea gai horretakoa bada. Albiste egokiak bestelako albisteetatik bereizten lagunduko dizue horrek.

Bada laborategi bat, “Ingurune adimendunak geure artean” izenburudun beste albiste bat, ingurune adimendunak sortzeko beharrezko komunikazio-sareak azaltzen dituen hirugarren bat, ingurune adimendunetarako mikrotxip bereziak garatzen dabilen Nafarroako ikerketa-talde baten albistea, ingurune adimendunetan euskara erabili ahal izateko AnHitz proiektua....

	Argazkia: Fraunhofer

Etxerako aplikazioei buruzko berriak ere badaude. Izan ere, etxe domotikoak ingurune adimendunen oinarria dira. Basque Research-en sukalde domotikoak aipatzen dira, eta egosketa automatikoki egiten duen eltzea, eta etxeko tresna elektrikoak ahotsaren bidez kontrolatzeko sistemak. Gainera, Domolab proiektuaren berri ere aurki dezakezue Interneten. Erabili zuen gustuko bilatzailea (Google, Yahoo,...) eta egin proba. Argazki interesgarriak daude, gainera!

Argazkia: VICOMTech

Noski, horiez gain, badira etxera, lanera edo banketxera sartzeko sistema berritzaileak garatzen ari direnak ere. Horiek biometria erabiltzen dute sarbideak 'adimendun' egiteko. Hau da, etxeko giltzak beti poltsikoan eraman ordez, egokia litzateke ate parean jarri, kamera batek gure begiaren irisari argazkia atera eta atea irekitzea, ezta? Horrelako ikerketak ere geure inguruan ari dira garatzen. Egin proba biometria hitzarekin Basque Research-en edo Interneten.

Eta zahartzen garenerako sistema berriak garatzen ere ari dira beste hainbat talde; erortzen garenean laguntza eskatzeko sistemak garatzen, gure osasuna neurtzeko gailuak egiten, etab. Horretan ari dira Lifestech proiektuan, arropa adimenduna garatzen. Izen hori pista handia da; gaztelaniaz dago informazioa.

Frantzian ere ibilgailu adimenduna sortzeko pausoak ematen ari dira. Agian, etorkizunean, “Bilbora joan nahi dut!” esango diogu autoari, eta berak bakarrik eramango gaitu. Zertan dabiltzan jakiteko, jo ezazue Interstices web gunera eta han bilatu. Benetako probak egin dituzte ibilgailuarekin, eta horien argazkiak daude.

	Argazkia: Philips

Horiez gain, Europan, Philips etxea da ingurune adimendunetan aitzindaria, eta guk adibideetan erabili dugun aplikazioa ikusi ahalko duzue haren web gunean. Web gune osoa dute ingurune adimendunei buruz, ingelesez noski. Han, 7 proiektu aipatzen dira: iCat, Ambilight, MiraVision, Virtual Fitness Coach, Eassy Access, PML eta PHENOM. Guztiak oso interesgarriak eta irudiak lagungarri dituztela.

Bilaketa horietan topatu dituzuenez gain, hauek dira Euskal Herrian ingurune adimendunetan ikertzen diharduten zentro teknologiko eta unibertsitate batzuk:

Robotiker, CEIT, ESI, EUVE, IKERLAN, LABEIN, TEKNIKER, VICCOMTech, Nafarroako Unibertsitatea, EHU eta Mondragon Unibertsitatea. Guztiak AmIGUNE proiektuan daude, ingurune adimendunak garatzeko. Elhuyarrek, Fagorrek, Oronak eta beste hainbatek ere ikerketa-lerroak dituzte.

Argazkia: Philips

Eta munduan, besteak beste, Philips, France Telecom, Siemens, Microsoft, Motorola, Nokia, Telefónica, Telvent, Thomson, VTT, Fraunhofer, Inria, Madrilgo Unibertsitate Politeknikoa, Twente eta Lovaina ere ari dira halako lanetan. Badakizue, oraindik gogoz bazaudete, ikus itzazue haien web guneak, eta, zortea baduzue, proiektu interesgarriak topatuko dituzue.

Honezkero nahikoa informazio izango duzue, eta, beraz, orain, ariketari amaiera emateko, aplikazioren bat probatzea proposatzen dizuegu.

Scansoft eta Ahotts proiektuetan, guk idatzitakoa euskaraz ahots goraz esaten du ordenagailuak. Horretarako, ahots-sintetizagailu bat erabiltzen dute. Probatu eta ikusi nola dabiltzan.

Ariketa amaituta, zuen aplikazioa proposatzeko garaia da. Badakizue, gorde interneten topatu duzuen ikerketaren baten erreferentzia aurkezpenerako, eta, aplikazio horretatik abiatuta, irudika ezazue zuen asmakuntza. Animo eta ekin lanari!