Arratsaldeko lauak dira. Dimitrios, elikagaien multinazional bateko 32 urteko langilea, kafea hartzen ari da bulegoko kafetegian, nagusiarekin eta zenbait lankiderekin. Atsedenerako tartean ez du inork gehiegi gogaitzerik nahi. Hala ere, etengabe ari da mezuak eta deiak jaso eta erantzuten.

Harro dago 'gizakiekin komunikatuta egoteaz'. Bere lagun eta lankide asko ere bai. Dimitriosek soinean darama, arropan txertatuta (edo gorputzean), ahotsaren bidez aktibatzen den 'ate' bat; edo, bestela esanda, bere buruaren avatar digital bat. 'Ni-D' edo 'Ni digitala' deritzo lagunartean. Dimitriosek ingurunearekin duen elkarrekintzatik ikasteko, komunikatzeko, ulertzeko eta erabakiak modu egokian hartzeko gaitasuna duen tresna bat da 'Ni-D'. Hasiera-hasieran, Dimitriosek apur bat programatu behar izan zuen tresna, eta orduan uste zuen aldian-aldian eguneratu beharko zuela. Baina ez du horretarako beharrik izan.
Bere 'Ni-D'-arekin eroso sentitzen da, eta haren erreakzio 'adimendunengan' fidatzen da.

Lauak eta hamarrean, bigarren mailako beste hainbat deiri kasu egin ondoren -zailtasunik gabe eta formal erantzun ditu 'Ni-D'-ak, Dimitriosen ahotsa eta doinua egoki erreproduzituz-, Dimitriosen emaztearen dei bat detektatu du 'Ni-D'-ak. 'Ni-D'-ak hartu du deia, eta elkarrizketa laburra izan du emaztearekin: zertan ari den azaldu eta pixka bat itxaroteko eskatu dio. Aldi berean, Dimitriosen 'Ni-D'-ak beste 'Ni-D' baten mezu bat jaso du; alboko metro-geltokian dagoen pertsona zahar baten 'Ni-D'-arena, hain zuzen. Pertsona horrek etxean ahaztu du bere botika, eta han inguruan non eskura dezakeen galdetu dio bere 'Ni-D'-ari, hizkuntza naturalean. Kontua da Dimitriosek bihotzeko arazo berdinak dituela eta botika hori bera erabiltzen duela. Dimitriosen 'Ni-D'-ak eskura dituen datuak prozesatu eta eskatzaileari emateko prestatu ditu. Gertuen dauden saltokien zerrenda, ordezko botiken zerrenda eta autolaguntzako taldeen kontaktua eman dizkio, baina Dimitriosen nortasuna ez ezagutaraztea erabaki du (pribatasun-maila), eta Dimitriosen laguntza zuzena ez eskaintzea ere bai (une horretan ez baitago eskuragarri). Informazio hori guztia pertsona zaharraren 'Ni-D'-ari helarazi dio, ez pertsona zaharrari, informazioa alferrik ez bikoizteko.

Bitartean, Dimitriosen emaztearen deiak Dimitriosi abisua emateko bezainbesteko larritasuna duela ulertu du, eta aurrez adostutako soinuarekin 'deitu' dio. Dimitriosek kafetegian eskuragarri dauden displyaphone-tako batean hartu du deia. 'Ni-D'-ak erruz erabiltzen hasi zirenez geroztik, jende gutxik eramaten ditu gainean terminal mugikorrak. Toki publiko eta pribatu gehienetan eskuragarri daude, eta, bestela, zure 'Ni-D'-ak beti esango dizu non dagoen badabilen bat! 'Larrialdia' seme-alaben etxeko lanei buruzkoa da. Bederatzi urteko semeari Egiptoko eguneroko bizimoduari buruz lan bat egiteko eskatu diote. Dimitriosek, hiruko deiaren bidez, eskaria berriz bere 'Ni-D'-ari pasatzea proposatu du, hark Egiptoko umeren batekin kontakta dezan. Hamar minutu geroago, semea adin bereko neskato egiptoar batekin ari da bideokonferentzia bidez hizketan, eta denbora errealean izaten ari diren elkarrizketa hori -aldi berean itzulitakoa- grabatzen ari da, etxeko-lanen zati izan dadin. Komunikazio-prozesu guztia Dimitriosen 'Ni-D'-ak antolatu eta kontrolatu du eta, bitartean, datu berriak jaso eta bestelako eskakizunei ere erantzun die.