Zientzia,Teknologia eta Berrikuntzaren Astearekin bat eginez, Teknoskopioa lehiaketa antolatzen du urtero Elhuyar Fundazioak.
Teknoskopioan, hamalau urtetik hemezortzira bitarteko neska-mutilek har dezakete parte. DBHko bigarren zikloko, Batxilergoko eta LHko ziklo ertaineko ikasketak egiten ari diren ikasleentzat prestatutako ekimena da. Teknoskopioa lehiaketaren bidez, ikasleak motibatu nahi ditugu. Horretarako, gaurkotasun handia duen gai baten inguruko edukia prestatzen dugu, haien ezagutza-mailara egokituta, eta zientzialari/asmatzaile/sortzaile-lanetan jartzen ditugu gazteak.
Aurtengo Zientzia eta Teknologiaren Astea, seigarrena, azaroaren 10etik 16ra egingo da, eta "Lehengaia: talentua eta Lur planeta" izango da gaia.
Biziaren etorkizuna eta planetarenarena elkarren mende daude neurri handi batean. Hala ere, ez dago batere argi nolakoa izango den Lurraren eta Lurreko biziaren etorkizuna. Mehatxuak asko dira, eta nahiz eta pixkanaka neurri batzuk hartzen ari garen, Lurrak eskertuko luke superheroiren baten laguntza.
Horixe da, hain zuzen ere, aurtengo Teknoskopioa lehiaketako partaideei proposatzen diegun erronka. Mundua salbatuko duen superheroi baten azalean jarri beharko dute, eta superheroi horren bloga sortu. Edukietan, jarraibideetan eta blogak sortzeko plataforman sartzeko, egin klik goiko irudian.
