Akupuntura terapia zaharra da eta gero eta jende gehiagok egiten ditu akupuntura-saioak erretzeari utzi edo soberako kiloak galtzeko itxaropenarekin. Batzuentzat eraginkorra izaten da eta besteentzat ez hainbeste. Hala ere, zientifikoki frogatuta dago akupunturak nola eragiten duen, eta inork ezin dezake esan akupunturak ezertarako balio ez duenik.

Ez da ikerketa zentro batek akupunturaren aldeko jarrera agertzen duen lehen aldia, baina bai azalak akupuntura egitean nola erantzuten duen, era zientifikoan, frogatzen duen lehenengoa. Orain arteko ikerketek akupunturaren eragin terapeutikoa ikertu izan dute. Oraingoan, azalaren erantzuna aztertu da.

Vermont-eko medikuntza-unibertsitatean eraman dute aurrera 60 gaixorekin egin den eta bi urte iraun duen ikerketa. Ikerketa horri esker, ekialdeko medikuntzari, eguneroko bizitzan medikuntza alternatiboa deritzogunari, sinesgarritasun handiagoa emango zaiola espero dute ikertzaileek.

Sinesgarritasun ezaren arrazoi nagusia orratzen erabilera da. Izan ere, ekialdeko medikuntzan orratzak sartzea ohikoa da, eta ez da beti helburu terapeutikoekin egiten. Horregatik, orain arte ez zaio sinesgarritasun handirik eman akupunturari. Ikerketa berrian parte hartu duen Helene Langevin ikertzaileak eztabaidarako elementu berria plazaratu du eta, neurri batean, akupunturak batere eraginik ez duela diotenak isilarazi ditu.

Helene Langevinen arabera, akupunturan, orratzak berak baino garrantzi handiagoa du egiten den manipulazioak. Ziztada egin eta orratza mugitzen ez bada, akupunturaren eragina murritza dela ikusi dute. Aldiz, orratza errotazioan mugituz gero eraginkortasun handigoa lortzen da.

Zertan datza akupuntura?

Akupuntura duela 2.500 urte sortu zen Txinan. Orratzen bidez akupuntura-puntuak ziztatzea da terapia horren muina. Txinako medikuntza tradizionalaren teorien arabera, giza gorputzak 2.000 akupuntura-puntu inguru ditu. Puntu horiek elkarrekin lotuta daude, eta gorputzeko neurotransmisoreetan eragina duten ezaugarri elektrikoak dituzte.

Akupuntura-puntuak lotzen dituzten bideek gorputzak behar duen energia-fluxua sortzen dute. Energia-fluxu horretan etenak gertatzen badira, gaixotasunak sor daitezke, eta orratzen bidez ziztatuz gero, desoreka horiek konpondu eta energia-fluxua hobetzen omen da.

Gainera, mina sendatzeko ez da beharrezkoa zuzenean mina dagoen lekuan eragitea. Izan ere, minaren bulkadak transmititzen dituzten nerbio-zuntz batzuk estimulatuz, beste nerbio-zuntz batzuetan mina blokeatu egiten da. Sare bateko hari bat mugituz beste hari batzuk ere mugitzen diren gisan, nerbio batzuk ziztatuz beste batzuetan ere eragiten da.

Tradiziozko terapia horren oinarrian zera dago: gizaki orok gorputzean Qi izeneko bizi indarra daramala. Energiari loturiko kontzeptua da eta bizitzeko ezinbestekoak diren hainbat jarduera gauzatzen ditu, hala nola, termorregulazioa, defentsa sistema, gorputza haztea...

Gorputzak 2.000 akupuntura puntu ditu, horietako asko belarrietan.

Desorekaren bat gertatzen denean, bizi-indar hori eraldatu egin daiteke eta, ondorioz, gaixotasunak eta minak sor daitezke. Desoreka bizi-indarra osatzen duten indar desberdin eta aldi berean osagarrien artean zerbait gertatzen denean sortzen da, Ying eta Yang indarren artean alegia. Oreka berreskuratzeko, Txinako medikuntza tradizionalak dio gorputzaren barnealdeko organoen eta kanpoko elementuen —lurra, sua, ura, egurra eta metala— egoera parekatu egin behar dela. Akupunturaren bidez ere saiatzen dira Qi erantzuna lortzen. Erantzun hori orratza ateratzean nabaritzen da, eta arrainak amuari tiratzearekin parekatzen dute. Ongi eginez gero, pazienteak, kirol asko egin izan balu bezala, giharreko mina sentitzen du.

Txinako medikuntza tradizionala asko hedatu da mendebaldeko herrialdeetan ere. Hainbat ikerketak erakutsi dutenez, akupuntura eraginkorra suerta daiteke adikzioei aurre egiteko, buruko eta lepoko minak sendatzeko, haginetako mina kentzeko, anestesiak edo kimioterapiak eragiten duten goragalea arintzeko, gehiegizko pisua galtzeko eta enboliaren errehabilitazioan laguntzeko.

Ikerketaren muina

Akupunturaren oinarri zientifikoa frogatzeko, Vermonteko ikertzaileek, ordenagailu bidez, orratza ateratzeko zenbat indar egin behar den neurtu dute. Ikusi dutenez, orratza sartu eta errotazioan mugituz gero, azalaren eta orratzaren arteko lotura finkatu egiten da eta orratza ateratzeko indar handia egin behar da. Horrek lotura handia dagoela erakusten du. Aldiz, orratza alde batera eta bestera mugituz gero, orratza ateratzean egin behar den indarra % 53 soilik emendatzen da.

Horrela, argi gelditu da orratzarekin manipulazioak egiteak efektu biomekanikoa duela. Eragin hori kontrol-puntuetan eta akupuntura-puntuetan ageri da, baina zertxobait nabarmenagoa da bigarren puntuetan.

Orain arte, akupunturak muskulu-kontrakzioak sortzen zituela uste zen, baina Langevin ek dioenez, azalak eta/edo azal azpiko ehun konektiboek ere parte hartzen dute gorputzaren erantzunean. Izan ere, orratza ateratzean argi ikusten da azal azpiko ehunak nola atxikitzen duen orratza.

Horrenbestez, orratzen ziztadek baino gehiago egiten diren manipulazioek nola eragiten duten frogatuta gelditu da. Baina, bestondoa kentzeko eraginkorra ote da? Froga egin nahi duenarentzat ez dira garai txarrak.

7k-n argitaratua.